جه وجمبي وقف وقعد مبحلقلي
وقالي ازيك يابو الشباب شكلك مش عارفني
بصيتله من فوق لتحت ولشكله بصراحه مارتحت
قلتله اعزرني ماوخدش والله لبالي
ضحك وقال لما هنقعد ونتساير هتفتكرني
قلتله معليش انا مش فاضي
قالي بس اقعد النحيادي
وقعد واتربع وبعدها مد رجليه وبرطع
وقال اعرفك بنفسي انا الاستاذ ملل
اكيد افتكرتني منا اكيد زرتك زمان
و دلوقيتي حان الاوان اني ازورك تاني
وراح شفط الهوا بسرعه ونزل عليه بعزمه
وملاني ملل ممل لاقصي الحدود
خلاني زهقت ومبقتش طايق
وكرهني في الي بعمله كله
ورماني وسط دنيا لونها باهت
واهو عدت الايام وراها الايام
كل يوم زي الي قبله
ولساه الملل لازق فيا ومتبت
وفي يوم صحيت الصبح ف الضهرية
علي شمالي لقيت ملل قاعد و علي يميني سحنه غبية
وش مضلم وقعده مؤذيه
و عيبص للملل وبيتبسم
قلت ياعم ملل مين دهواتي
قال عمنا كلنا وتاج راسنا من فوق
ايوه ياعني مين ياعني
قال استاذنا احباط
سمع عنك وعن قعدتك الحلوه
فقال لازم اجي واقعد معاه
وقام وجه عليا يسلم
ومد ايده وكتف ايديه و رجليه
وفي وداني قال
مالهاش عوزه القومه بعد الحين
هتروح فين
ادينا قاعدين
ورا الباب في حيطه سد عمرها ماهتنهد
والشباك قصاده جبال ما تنعد
ومانتاش احسن من الي قبلك
ولا هتعمل اكتر منيهم
وهبطت عليا الضلمه ف عز الضهرية
وراحة مني العزيمه والحرية
خطفهم مني الحرامي الكبير
سرقهم بسرعه وخفه
ولما تاكد اني خلاص مستسلم ورافع الرايه ومسلم
راح بعت جاب عشرة عمره واحسن صحابه
ووقف وسلم عليه وخده بالأحضان لما شافه
وقال اعرفكم
بالخطير الي مالوش امان
المتمكن السريع
قاهر كل زمان
الاستاذ احزان
يدوبك سمع ملل اسمه راح قام وانتفض وسلم ع الكبير
وانحنا قدامه وخاف تقلوش ياخواتي وزير
فقلت ف نفسي اقوم اسلم ده برضه الراجل ضيف
لقيت التكتيفه لساتها قاعده
قلتله اعزرني يعالي المقام
قال مايهمكش ما بسلمش ع الحر الي واقف علي رجليه
وططب بيده علي ضهري
ويدوب شالها ملت الضلمه صدري وقلبي
والدنيا الباهته اسودت
وعرفت الحزن الي عمري مادقته
ولا اتصورت اني هقابله
وخلص الكبير علي الاسير في ثواني
بعد مابعت رجالته
الملل والاحباط
وبعدها هو بجلالته
خططته معروفه وقديمه
لكن الناس كلها تحت جبايته
يسلبك ف الاول هدفك
وياخد بعده عزيمتك
ويسبك ف الاخر حتة حديده
محمد العسال
ya_laile@hotmail.com
|
